Anne François Louis Janmot (1814-1892)
En la cobil, que tá enllena
d’ escoridá y de mugor,
hay un neñín y una pena,
hay una má y un dolor.
Son pena y dolor abondos
los que entren en ’a cobil,
siempre muy grandes, muy fondos
y con el mesmu prefil.
El neñu, lloramicando,
ta siempre co ´l mesmu afán
-Ay, má…!- solluta dacuando-
teno fame, queyo pan….!
Y ya la má aburuxada
apiértalu escontra ’l sen,
y non i arrespuende nada,
y lloramica tamién….
El neñu, famientu u quiera,
fo un mozu de perdición;
toa la cobil u ñaciera,
teníala ’nel corazón.
El semó fuebu ’nos eros
a puntu ya de coyer,
y él atopó en los senderos
muncha sangre que verter.
Y fó tan mala so zuna,
que ainda muertu tres sofrir,
non hebo rosa denguna
que lu quixera cobrir….!
Viólu un anxelín en vuelu,
viólu y entrugói entós:
-Y tú qué lleves al cielu
pa disculpate con Dios…?
Tou abruyau en so espantu,
faloi como creminal:
-Llevo de mal non sé cuantu,
llevo cien fechos de mal…!
De bien en todes miós güelles
ni un solu rispiu surdió;
embaxu de les estrelles,
non hay gañín como yo….!
-Peru enxamás dio to vía
daqué de llume quiciás…?
Y enllenu de coruxía,
cuntoi el mozu:
Enxamás…!
Y entós el ánxel:
_Vo al mundiu,
tu aspera, buscaré yo…..
Y como en un arreflundiu,
él vieno al mundio, y golvió.
Golvió con una fortuna
de gotines d ’alborá;
más que sol y más que lluna,
más que fuebu y más que ná….
Y el ánxel dioi les gotines,
y dixoi al mozu asín:
-Son todes les llarimines
que erramaste de niñín….!
Constantino Cabal (1877-1967)
